Forum&Chat mypbm
Would you like to react to this message? Create an account in a few clicks or log in to continue.

KISAH-KISAH BANJAR

+15
Auma
TantadukHabang
albanjary
Amat Abon
suroi
didin
Dandan Setia
kawo
*ROSMAH*
maey kambu
mishaannur
Atong
hasbima@abe
utoh-Q8
UmaYani/UY
19 posters

Page 1 of 5 1, 2, 3, 4, 5  Next

Go down

KISAH-KISAH BANJAR - Page 2 Empty Re: KISAH-KISAH BANJAR

Post by UmaYani/UY Fri Nov 06, 2009 3:45 pm

AKIBAT KADA PAASIAN
Ulahan: Ninianom



Pagi tadih masa tulak baumbaian ka sakulah wan Jurinah, Abib, Iros , Paridah wan Intan, dipa nih madahkan ka diyang, jer malam ni ada carita Malayo di TV batajuk "Jalak Lenteng". Biasa lah satiap malam Sabtu ada carita Malayo nang di hadang hadangi urang kampung satiap minggu. Rumah nang paling parak ba TV ialah rumah Wak Sanip, kira urang kayalah di kampung tuh. Rumah nya dari rumah diyang mun bajalan batis kira kira 20 minit, kada la jauh bangat tagal nang kada rame tuh ialah kadap, dah lah daida basuar, jalan nya pulang kanan kiwa tagah. Ada jua jalan nang agak baik saikit, kira jalan ganal laaa...tagal pulang kana manampah jalan kubur, tu nang asa mamburinjing gulu tuh bila maingat ingatakan.

Kaya malam malam Sabtu nang tadahulu, tuhuk la diyang ni marayo ka uma ayah handak tulak manireng carita malayo. Uma ayah diyang ni kada taho lah pesen apa..kuno bangat...jer uma ayah BADUSA babini bajalan tangah malam, tu nang asa marista bangat tuh, padahal kawanan babini diyang nang lain kada suah taliung tulak manireng carita malayo, bukan kawan kawan haja nang tulakan uma ayah dipa gen umpat tulakan, mawa tikar bagulung nang di kapit di katiak hagan dudukan saparanakan kina.

Diyang dah baajam, malam ni diyang musti tulak jua, jer kawanan diyang carita "Jalak Lenteng " ni saja best. Biasa la mulaan nya diyang marayo ka uma ayah handak tulak. Jer diyang " sakaliiiiiiiiii hajaaaa". Napa jawapan uma?? "jen takuni ayahmo". Tulak pulang ka ayah, ayah pulang manjawab "takuni uma mo",...parak saratus kali diyang nakuni uma ayah, jawapn sarupa haja. Diyang dah manangis dah, marista wan kasarekan, napa kawan dah bapuluh kali mangiau diyang , carit adah handak mula. Akhirnya ditinggalakan kawanan diyang, putus lah harapan diyang handak manireng carita "Jalak Lenteng"...manangis la diyang sampai taguringan.

Baisukan harinya kawanan tolong mancaritaakan carita malam tadih, sadih bangat hati diyang kada dapat manireng carita tuh, jer carita nya sadihhh bangat, hiro wan hiroin nya bungas wan langkar jer.

Minggu ni pulang jer carita lakunan P.Ramli, carita "Uma Mintuha ku". Diyang ubah tektik hanyar...hanyar mamukul 5.00 patang, diyang badadas bamasak masakan kasukaan ayah uma, basasadi, sunyaan lauk dah tahidang dibawah tanggui. Malam nih diyang bujur bujur inta balas kasihan uma ayah, tagal macam minggu minggu sabalumnya, jawapan ayah uma sama haja "takuni uma mo..takuni ayahmo...". Bila dah muyak mandangar kawanan mangiau diyang, apalagi malacong la diyang umpat kawanan, bukah mancicit, kada manireng balakang lagi dah..dalam hati takutan jua, mana tau ayah mangapongi diyang kah....mamupuh diyang kah.

Carita gen bamula....hanyar 10 minit carita bamula, cuntang gen kalinting kalinting babungi inta di andaki duit, diyang bapiragah kada mandangar haja..napa sakupang gen kada baduit, umpat kawan kawan haja, duduk gen bakajal di atas tikar bawaan kaluarga kawanan diyang. Bila carita bamula, urang sakuliling gen mula basurah jua...panuh parasaan...mun dalam carita tuh, si mintuha jahat, bah alihai....nang panuntun gen umpat manyariki si palakun tuh, muyak nya ai...mun sadih pulang, ummai panuntun sakuliling bahimat manangis..kira bujur bujur maikuti carita. Diyang ni asa muar bangat manireng kalaku panuntun nih, diyang handak manireng carita dalam pilem, tagal urang nang luar pilem pulang nang bahimat himat baamuk amuk kada tanto pasal.

Kada lawas, carita bamandak stumat, sabab handak manayangakan "Warta Barita". Pahadangan warta barita tuh, urang nang baduit tulak batutukar makanan nang dijual anak anak Wak sanip. kada taho kanapang situsaini tarasa handak bakameh, jadi diyang gen tulak la higa rumah Wak Sanip kadalam parang tagah. Hanayr habis bakameh masa handak mamuruk salawar halui, malqm tuh diyang batapih wan babaju kurung, situsaini tatireng babini tuha batalakong maikup kampil, hanyar bulik dari surau tukuhnya...ummai dalam hati diyang baharungut " saja alim urang tuha naya, urang saparanakan manireng TV, inya surangan tulak ka Masigit atawa ka Surau mambaca kitab wan sumbahayang". Balum gen sawat diyang handak batapih..situsaini diyang manireng urang tuha tuh tarus ha malanggar rumah disubalah rumah Wak Sanip...tarus ha bajalan..tambussss...sampai ka subalah sana rumah, napa lagi takipik diyang..diyang ingkuti haja tapih taros bukah masuk disasala kawanan tadih, manggatar pang kada hingkat baucap lagi. Kada taho lagi napa sambungan carita "Uma Mintuha Ku"....kada hingkat bapikir lagi dah, urang sunyaan kada taho napa nang diyang hadapai tadih, diyang gen kada hingkat duduk lagi, badangkak haja katakutan.

Samingguan diyang gareng, jer uma diyang aur maigau haja, satumat takuriak, stumat manggatar, bilang gigir sakampungan. Uma kada katuju maambili Bumuh hagan maubati diyang,pasalnya uma ayah kada pacaya bumuh lagipun jer ayah uma syirik, Tagal urang kampung bakaras, lalu di ambili bumuh maubati diyang cara kampung.

Bila dah ampih, awak diyang gen talalo lamah, parak 2 minggu diyang kada kasakulah. Di malam nang kadap lagi sunyi diyang tapikir, mungkin napa nnag diyang alami nih, adalah balasan Tuhan atas ulahan diyang ssaurang, KADA PAASIAN WAN KAWITAN
UmaYani/UY
UmaYani/UY
Brigedier Jeneral
Brigedier Jeneral

Posts : 3505
Points : 3508
Join date : 22/05/2009
Location : Meru, Klang

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by hasbima@abe Fri Nov 06, 2009 9:06 pm

ako managguhi Diyang tu UY masa bahari , masa kakanakan
hasbima@abe
hasbima@abe
Leftenen Jeneral
Leftenen Jeneral

Posts : 15609
Points : 15721
Join date : 13/06/2009
Age : 62
Location : tamaloh

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by *ROSMAH* Sat Nov 07, 2009 11:05 am

waw wrote:Kada nya U Y kadak....


nginto kisah bat kakak Diang Malacong

Ada haja alih nang ba ngaran Diang Malacong he..
Ka kalacong haja luko hari-hari.. KISAH-KISAH BANJAR - Page 2 Icon_bounce
*ROSMAH*
*ROSMAH*
Mejar Jeneral
Mejar Jeneral

Posts : 6093
Points : 6137
Join date : 29/05/2009
Age : 67

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by Dandan Setia Sat Nov 07, 2009 9:23 pm

KISAH-KISAH BANJAR - Page 2 Picture1-2

Nia orangnya
yang bangaran Diang Malacong ( DM ) Kak Ros'ai


Dandan Setia
Dandan Setia
Mejar
Mejar

Posts : 1116
Points : 1203
Join date : 23/05/2009
Location : Epoh, Pirak

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by *ROSMAH* Sun Nov 08, 2009 12:06 am

kalikir wrote:
KISAH-KISAH BANJAR - Page 2 Picture1-2

Nia orangnya
yang bangaran Diang Malacong ( DM ) Kak Ros'ai


Dimana gambar nya? kada hingkat di katik2?
*ROSMAH*
*ROSMAH*
Mejar Jeneral
Mejar Jeneral

Posts : 6093
Points : 6137
Join date : 29/05/2009
Age : 67

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by hasbima@abe Sun Nov 08, 2009 10:04 am

umai ngaran diang malacong
lakinya masti ngaran utuh tasungkam
hasbima@abe
hasbima@abe
Leftenen Jeneral
Leftenen Jeneral

Posts : 15609
Points : 15721
Join date : 13/06/2009
Age : 62
Location : tamaloh

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by UmaYani/UY Mon Nov 09, 2009 1:22 pm

MANYALAYA
*Kalua Dagang*


Upal batakun ka nenek bini wan atuk laki. Takakana bagamat manyuuk, bakidip bapatak mamaraki handak manyuari ka nang tuha-tuha bahari, napa ‘pandinding’ ilmu panyangga diri ? Huhunyanyang, kalawasan mangiciki. Tapaning surangan batapuk dahi, bagintas jari, gagarunum bilang parak satangah lali. ”Napa jua pang tuntutan andika bahari ?” Bubuhan nang anum takarumus muha, tagicing gigi, garujutan kaning, kujub-kujub, takijim tabincalak umpat mahawasi, magun kada jua maharati. Gawian nang disambat turang MANYALAYA .Wasi tuha batagar nang jabuk di haragu, ‘barang’ tahagaan rahat mangukut bulanak manambak tungkaran. Dikariup, dipundut awan kain kuning bakasumba bungur. Napa ka inahulnya ?

Kucing marau laki, hirang mantuala saikungan nang pina katuju diingu. Babatis handap, batalinga capang, hidung mingar, sisingut labat. Mata bulat nyarak bila maningas, kada bakirip, habang mancirau ilah tataguk. Amun mangiau, mamburinjing cagat bulu awak mandangar. Kada magan di galah, dihanyakan haja, jauh sakali amun di pupuh awan sasapo, ngintu kucing ‘inguan’, jangan dihirani. Amun digalah gin, mancungkung, manyadin mambu-u haja. Kada bisa basisimban, dasar ‘binatang inguan’. Kada cagar ba-ugah, kada bukah mancicing ilah kucing-kucing lain. Kaina malam ada nang baulihan, ada nang bahilangan, ada nang kamalingan. Sarumahan sunyi suung kana pukau, janak guringan kada sing garakan. Si Maling umpat makan pahadangan mahungkar barang cuntanan. Kaina satuyuk tahi ditinggalakan. Gawian bilang baliwatan….. sapala intuh babanar ….

Urang bahari banyak nang katuju ‘manuntut’. Nang lalaki handak taguh, handak kuat, handak kabal. Gancang basahanan, tung banih dijujung di kapala awan layarnya, banih saguni bapangup dikilik maringgung kiwa kanan. Tugul manajak, talah satangah long sapagian. Batulang wasi baurat dawai, bahati karing, batalinga rinjing.

Takajut tasimpurut duktur, takuciak misi, injik dibahu, malitak patah jarum, kada lanjam. Ada nang handak baisi ‘Ilmu Panunduk’ bagawi nyaman aci tunjuk, ricuk-ricuk. Urang takutan, napa kahandak diturutakan. Akal mamilanduk. Napa jar sidin satuju tantan, ilah karabau di cucuk hidung.

Nang bibini handak, “Ilmu Pangasih” bapamanis disayangi laki. Napa jar bini kada kawa ditangati. Babahum saurang manurut sakahandak hati, nang laki karap dikalihumi, lalu nasi di padu sapariukan ‘ditangasi’. Bacari, manuntut satayuhnya ilmu nang kada karuan. Basusuk jarum amas gasan mamarunai pipi, putih mampilak kadada bakunat. Licin kaya hintalo bakupas, arai bangat amun disaro “Si Diang Bungas”. Di tangah kaning susuk bahalang, manghias alis nang lantik. Bagalung, basanggul tinggi pesen ‘aneka gorondo’

Di bawah dagu susuk malintang, kakaruncum, muha manis, kada suah marong, kukurihing tantan, bagigi amas kada bisa basasarik.. Tahi lalat ulahan ditambahi, talinga disubangi, jari diinai-i. Basusuk di bawah ilat gasan manyamani suara. Cacaringit bakuriak banyanyian, bilang sampai tamimpi-mimpi, karindangan. Maigau-igau, malalur kasiangan.

Nang basusuk di awak nyawa liat, ngalih mahadap mati. Ditimbak awan paluru amas, manjul kada mambari bakas, awan paluru pirak, matan takipai tapuracak, kada jua batamu ajal. Ditimbak, ditatak, disudat, diudar magun banyawa. Di gantal disumbalih kada pagat urat mareh. Dirandam ka sungai, kada kawa lagi maliwa. Paampihan, disudi awan buluh barincung sumpahan pamuga masa baguru. Sangsara hidup handak bamati. Tuntutan kaitu gasan dunia nang pana. Kada manyanangkan, kada manyugihkan, imbah ta-ulih bala, azab sangsara.

Saminggu sakali ‘haraguan’ diunjuki habuan, dibari pamakan saidang bajubung, sanyiru wawadaian, apam mirah apam putih. Diandak, ditagai di tangah ruang. Gagarungkap ilun kadangaran. Isuk pagi disingkai di bawah tudungan, dilihati, tatinggal idang puang, langis kada bakaliungan. Pinjung rumah ditungkali, baras kunyit dihamburi, bucu rumah dikulilingi tujuh kali, tihang ibu dipajari. Rumah bahari batihang ‘karas’, di tarah awan balayung.

Tumbak barajah bangaran Khalifah kana digaduhi. Kapiangan, amun kada diharagu jurang ‘mamakan’ tuan. Kaina mati nang tuha, kana ada nang manyanggupi - mahakuni. Amun kada disanggupi kaina bangalihan. Garing manahun, batangah bulanan kada jua tacabut hinak urang nang maharagu. Awak kurus manjaing, gigi jalanggaran, pipi limpap, mata calong, batis tatinggal tulang karing, daging kandal sudah kandur, dada lipir tinggal kurangka, kapala gipih, suara garut, basurah kada lungkas, kada babuku kada baruas lagi. Ta-ampar surangan di paguringan. Taganang Orkes El-Suraya Medan wan lagu “ Salimut Putih “.

Manggayau takamih di tapih, lancun saawakan, hancing saalaman. Magun kada mada lawan kaluung, mahantos bubur nasi kada maalang. Talah batangah purtin , mahaup-haup ilah saminggu kada tahaba makanan. Guring balampas kahangatan.

Ilat tajulur panjang sampai ka barumahan. Guring di padapuran. Disintak di ulur, sampai tapulilit di rasuk di galagar. Barabah surangan ‘mambarungun’. Bangun mancugat mamandiri ‘inguan’, ilah urang basurah surangan.

Dirut-dirut ilah ilun itik manyudur
Napa di hirup, napa di kinum ? Urang batakun,
Jar….banyu pucirin.
Muriri, galianan, mandangar
Napa tuntutan ? Napa ulihan ?
Napa maka manyalaya bangat ?

Mata cagat maningadah ka bumbungan.Awak dingin manganyim, kuku biru, palipatan karas. Nang suah kahantuan kawa malihat ‘Si Iblis’ baatui di alang, mahadang handak manyakak puhun gulu ‘tuannya’ karana pamakan kada di bari. Anak cucu takutanan, tajun bacuntan ka barumahan. Mana jalan kaluar nang ‘diharagu’. Kahulu kahilir sasarudup bacari bumuh, mangasiam minta ganiie minta tulungi. Bangsul bumuh lalu batakun. Siapa nang hakun manyanggupi bat kawitan ikam nih ? Anak cucu, ba-uling kada, ba-unggut gin kada.

Sakalinya bumuh sudah lawas manaho.
Hanyar sampai di muhara lawang,
Luman sawat malangkah watun,
Bau bilang manyalangsang.
“Sidin sudah kadada lagi.” Jar si bumuh.

Kawitan mangaroh ilah karabau kana sumbalih. Hinak habis, tabulaning tajujul bigi mata manciling. Satangguk mata urang datang maniring. Ada nang kapidaraan, maigau-igau kada mau taguring samalaman, katakutanan. Kayapa malaikat manyintak pahinakan ?

Takibar samangat, taungkap tulang bumbungan, tasilak hatap rumbia, takitar titiwa, mancuhung lubang tambus ka langit – bakas kaluar ‘barang haraguan’. Kayapa pulang maurus janazah, batakun ka tuan guru ka tuan Imam. Mapa mamandi, mapa mangapan? Hulat kalatikan, bahamburan, kaluar dimuntung, bagarak dihidung. Bau haruk sakampungan, saalamanan. Sambil mamandi sabuyung minyak engsen dikubuyi, bau bangkai magun mandingur. Satusaini dikapan lalu disumbahayangakan, awak nang tinggal sakaping papan. Ditangah halaman, bagarak-garak tabala, kakarubut tangan di dalam kain kapan…Takipik mamarina sapadangsanakan, wani-wani takutan. Saikung-saikungnya mandam. Mapa handak mambawa ka pakuburan. Balapan kakanakan nang gancang, tamam-tamam awak manyahan, mausung baumbaian sampai lantur buluh hauran. Pangusungan maumat-umat……Barat....Barat….Barat…Bawa bamandak, barantat satumat…takalirut muntung basurah surangan. Dihihingkatakan, diusung tarus ka tanah pakuburan. Manabuk liang gin batutunjulan, kada wani, kada hakon kaluko kapuhunan. Takajut sabarataan, tanah liat rumbih sing ganalan. Liang halui jadi ganal. Musim karing, kamarau panjang, tagal banyu magun mangkabau. Mapa mamatak tabala timbul. Dijajak dihindik hanyar mahu tinggalam. Tumbar urang sakampungan.

Tu pang jurang mun ‘ kada ditampan bumi’

Galitiran awak saikungan kadinginan, mancabi-cabi puhun gulu, ganal hinak, lamahan lintuhut mahadang ari mulai kadap. Sunyaan kada sabar, kulang kapik handak mantok badadas, badadahuluan maninggalakan pakuburan nang kada bakatalahan.Talqin handap ancap dibaca-akan pahadangan urang mula baisur.

Talah sapaju mamangan urang tuha bahari.

Parang kumpang nang disayangi paninian laki, simpak salawi matanya di asapi tiap malam Jumahat. Baju hirang dipuruk satahun sakali, dijarumati intang nang rabit. Batu guliga ‘sakti’ kawa bakunyung amun diparahi limau mipis. ’Batu hidup’ jar nang manaruhi. Karambit dumul ditakutani. Karis basapoh nang kawa ‘tarabang’ tapacak ka tawing saban minggu disintoki. Pisau lipat dilimaui. Kaca, papaci sarabanya baturang bahari di taruhi silip di dalam laci. Lading dumpu dikamiyani. Napa maka kaitu gawian urang tuha kita bahari ? Kamana tulaknya ilmu ‘kihal’ ? Kadadakah nang mawarisi gasan kita ari ni…!!!! Napakah ianya munafaat atawa mudharat ?
Pasan paguruan,

‘Jangan pati talalo manyalaya batuntut Ilmu Kiha’
‘Hati kada mau sanang. Pikiran kada tanang’,
‘Hidup kada mau nyaman,baganangan’,
‘Tuhuk bacari, uyuh bagawi’
‘Ulihan kada dibarakati’,
‘Ngalih mahadap mati’.



Wed Aug 7 18:33:17 2002
Sumber: Banjar International
UmaYani/UY
UmaYani/UY
Brigedier Jeneral
Brigedier Jeneral

Posts : 3505
Points : 3508
Join date : 22/05/2009
Location : Meru, Klang

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by hasbima@abe Mon Nov 09, 2009 1:57 pm

Umai ilmu sasat tu..maharagu hantu raya
mun kada palasit....paraya manuntut ilmu nang ka-itu kada-dak untungnya....ilmu agama nang sabaiknya...taga tu hanya kisahan bahari cagar....taladan awan kita

Tarimakasih UY Tarimakasih KD..sisipan bahasa nang baik sakali.

Umpat pulang di ako handak manyurung kisah-kisah banjar
Tasabut kisah dua laki bini..hudah talo tahon kawin kada ta-oleh anak. Nang laki ni tatulian sikit...mun kuat kada mandangar..mun macam babisik mandangar pulang. Tuhuk ba-ubat mancari bomu hagan dapat zuriat..taga balom jua ada razaki.

Satu lagi panyakit nang laki naglih handak bangun subuh. Di garak macam mana pun magun haja balingkur babunkun ngalih banar handak bangun..tuhuk nang bini, manyuruh bangun kada jua bangun.
Dipadahi urang ka nang bini...mun handak manyuruh laki ikam sanang bangun...masa mangarak ianya waktu subuh, guyang-guyang bahunya..sambat " bang subuh..bang.... subuh bangun ".

Subuh tu..nang bini handak mancuba patua..luko laki sanang bangun
Digarak -garak..oleh nang bini ' Bang subuh...bang subuh.." saumpama babisk parak talingga nang laki..babuncilik mata nang laki.. " napa umaknya bubuh " ....ayuha mun dintu papagian ni dingin..,,di rabahakannya nang bini...imbaham dibubuh..bubuh.....saja mandaran imbah tu hanyar mandi...hanyar salat subuh. Ka itu pang amalan nang bini bila subuh...." bang subuh... bang..... subuh "...nang laki tatulian tu parasan bini inta bubuh.....masuk bulan katiga lakat batianan nang bini...nah ham manjadi patua urang tuha..dangar habar bajurut hudah anak...luko masih haja nang bini ma-amal patua nintuk.
hasbima@abe
hasbima@abe
Leftenen Jeneral
Leftenen Jeneral

Posts : 15609
Points : 15721
Join date : 13/06/2009
Age : 62
Location : tamaloh

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by UmaYani/UY Mon Nov 09, 2009 2:09 pm

he..he...macam2 alih...

kisah bujurkah...saja bahuhulutan haje...
UmaYani/UY
UmaYani/UY
Brigedier Jeneral
Brigedier Jeneral

Posts : 3505
Points : 3508
Join date : 22/05/2009
Location : Meru, Klang

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by hasbima@abe Mon Nov 09, 2009 2:16 pm

kisah bujur UY..taga hudah di ulah
di bahasa banjar-kan
napang tatulian yak am....
hasbima@abe
hasbima@abe
Leftenen Jeneral
Leftenen Jeneral

Posts : 15609
Points : 15721
Join date : 13/06/2009
Age : 62
Location : tamaloh

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by *ROSMAH* Tue Nov 10, 2009 9:43 am

Ma ungkai carita jua..

Bahari jar, ada dua laki bini nia hanyar kawin. Bila hudah imbah ba sanding di rumah nang bibinian nya, tulak pulang ba i'ilangan (ba tandang) ka rumah nang lalakiyan nya..
Pagi imbah bangunan, mandi2 saraba nya, pangantin dua laki bini tutih tulakkanai ka dapur.. Umak nang lalakiyan nya tadi tangah ma olah sarapan, mamasaki nasi lamak awan sambal tumis ikan bilis. Nyiur hudah ba parut tapi balum ba parah lagi, jadi di suruhai oleh mintuha nang minantu bibini tadi manggini'ik mamarah nyiur!!

Bila nang laki mandangar umak nya manyuruh nang bini mamarah nyiur, ba laluan ha' ba ucap ba padah, ujar nya " Malam tadi inya manjapai mak ai" he..
Nang bini ka supanan ba laluan manjawab " inya gin malam tadi manjapai jua mak'ai" jar nang bini..
Nang umak manciling mata sambil uling2 kapala, inya tuhak banyak pangalaman jadi tahu'ai nangapa nang di maksudakan oleh nang anak awan minantu tutih.. Ba laluan mamarahai nyiur sa urang! asa gair kalo ha..ha.. KISAH-KISAH BANJAR - Page 2 Icon_redface KISAH-KISAH BANJAR - Page 2 Icon_lol

Imbah tu dipadahi wan di tuduhi hidin, jar din " orang tih! amun nangapa haja nang di olah di dalam kalambu jangan ba habar ka orang, mambari supan bangat!! Itu rahsia antara dua laki bini haja! kaina amun orang tahu pa' di wiwir orang ka sana ka mari, habis sa kampungan tahu"..

Sambil kita tatawaan ba caritaan gasan penglipur lara, ia gasan panduan kita jua! di padahi anak cucu jangan di buka rahsia di dalam kalambu..
*ROSMAH*
*ROSMAH*
Mejar Jeneral
Mejar Jeneral

Posts : 6093
Points : 6137
Join date : 29/05/2009
Age : 67

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by didin Tue Nov 10, 2009 9:23 pm

manyambung kisah Kak Ros

jadi laki bini tutih pina mandam ha baduaan, ayungannya sampai kakalambu, entah kanapa sabab, balalu ha kada sing taguran lagi laki bini tutih, guringan kakalambu, nang laki mahadap kakiwa nang bini mahadap kakanan , kada sing bunyian he' badua tutih, ari samakin larut malam, tapi mata masih tabuncalak haja badadua, tapinya kada saling batatap
kada basalang manit, babunyi mangalinting diluar panjaga malam mancatuk tihang listrik " tiiiiiiiinnggg " dihitunginya ulih nang laki didalam hati sambil mandangarakan sampai 3 x mangalinting, nang bini gin umpat juha mahitung , tapi am inya hudah sasain balarut ,takantuk juha hudah, nang bini tutih mandangar 2 x haja manggalinting bunyi tihang listrik dicatuk, balaluai nang laki wani mambuka pandir
laki : " barapa kali luncing tutih babunyi" , manjawab juha nang bini
bini : " pandangar ulun tih 2x haja", balaluai nang laki manangkar,
laki : "kada nya ah, 3 x tutih babunyi, tarjadilah pardabatan ditangah malam dini ari didalam kalambu,
laki : " talu kali" jar nang bini pulang
bini : " dua kali"
laki : " talu kali dingai"
bini : " kada ulun, dua kali haja"
sasain hangkoi badua baidabul soal bunyi tihang listrik didalam kalambu tutih, balalu tailan nai mintuha laki binian,
minth bini : "uuu... yah pa dangarakan anak tuh baidabul dikalambu subalah" jar din sambil manggarak nang laki , balalu ha juha mintuha laki tutih kajar talinga mandangarakan sambil maarahakan talinga kapinggir dinding kalambu, samakin jelas kadangaran mintuha basu al dua, talu kali.
imbah itu tih, mandam mam mintuha laki binian badadua , kada hingkat lagi mandangarakan idabul minantu dikalambu, ayungannya taguringan sabarataan ,
kaisukan arinya , dudukan laki bini di dapur sambil bamamakan wadai, kuitan dudukan juha dikursi dihiga jandila, batakun nai mintuha bini tutih kanu laki , singhaja banyaring saikit supaya tadangar ulih anakwan minantu
minth bini : " napang maka bakakarasan alih anak wan minantu malam tadi
minth laki : " iyih alih, caka nang dihantai ranai, cakada nang baribut-ribut" jar din, maulah aku asa bahiri mandangarakan.

he he he, jar atong -ngeh ngeh ngeh,.......
han jako tia, napa bisa salah sangka juha kuitan wan anak
dikira tih sual nangito, padahal urang bahual parkara bunyi tihang listrik

didin
Brigedier Jeneral
Brigedier Jeneral

Posts : 3388
Points : 3399
Join date : 21/10/2009
Age : 56
Location : Banjarmasin-Palangka Raya

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by *ROSMAH* Tue Nov 10, 2009 9:41 pm

He.. Asaan nang kuitan tutih ba idabul pasal hudah mandua kali'ik atau hudah talu kali leh Didin!! KISAH-KISAH BANJAR - Page 2 Icon_redface KISAH-KISAH BANJAR - Page 2 Icon_lol
*ROSMAH*
*ROSMAH*
Mejar Jeneral
Mejar Jeneral

Posts : 6093
Points : 6137
Join date : 29/05/2009
Age : 67

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by hasbima@abe Tue Nov 10, 2009 10:19 pm

manyambung kisah didin pulang
malam isuknya ...gagarisik kadangaran pulang dua pangantin hanyar kalambisikkan dalam kalambu
nang mintuha bini awan laki..ngangang talingga mandangar...napa nang di pandirakan. walaupun pangantin hanyar...pangintin bini hudah suah manjanda.....hudah talo tahon bacarai...tu pang ta-oleh laki hanyar. Bah bilang asa rami pang...ibarat dapat motor hanyar handak di pulas minyak sampai santak...hanyar puah hati. Bu kuncawis tangan baha-har..... Turun bukit naik bukit...turun lembah...tasungkam ka lopak...umai rami pang...kalupukan, kalapikan....mangalekek tatawa galianan. " Ni abang handak batakun..dingai...mantalah ikam suah balaki...
andih siapa nang panjang " takuni nang laki
' urung dahulu '
' nang ganal'
' urang ' dahulu jua
bah bilang asa sarik awan supan banar nang laki tutih
mandangar jawapan nang bini
batakun lagi ka nang bini..
' andih abang napa nang labih nya '...ujar si laki
' andih abang panjangai jua...taga bulu haja nang panjang "

kadangaran dari kalambu mantuha laki awan bini
' mambari supan ' jar hidin ba-dua babisikan
hasbima@abe
hasbima@abe
Leftenen Jeneral
Leftenen Jeneral

Posts : 15609
Points : 15721
Join date : 13/06/2009
Age : 62
Location : tamaloh

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by UmaYani/UY Wed Nov 11, 2009 10:32 am

KA MAKKAH
Ulahan: Pali batong


Urang tuhak nang handak kaMakkah nang bangaran Ammat Limon (banjar Alai), nang binik ngaran Diang Atak(banjar Kaluak) baanak tujuh, ampat lalakik taluk babinik nang anak sunyaan bagawik diida nang mengumpuli hidin, sunyaan barumah saurang, ma am hidin tatinggal baduduwaan narai, sabalum tulak hidin balajar saikit surah Arab, “kainak kada ngalih mun handak batutukar umak ikam mai”jar hidin, “nee’pak nang handak dibalek ayahnmuk?” jar nang binik, bailun kaluak, “kalukuk’i , ikam tok kada magan tatiring nang harat, laluk’i ricuk-ricuk awan muntung”.jar nang lakik salayak bagayak. Diang Atak takurihing simpak ka nang lakik, baingang hidin tulak kadapur handak mananggar burit cirat hagin maulah banyuk, mangubui butuh rakungan nang tarasak karing. Ammat Limon maniring narai nang binik kadapur, barukuk lipos-lipos imbah hidin maurut sisingut nang mamapak huban awan pupukian muntung, mahadang banyuk kopik ulahan nang binik, nang katuju intang liur hidin kada juak bangsol.

“Ooo uma ikam ancapi kakanakan mahadangi neh, kalukuk talapas kapaltarabang” jar Ammat Limon ka nang binik, nang baawak lamak awan bayut mun maulah gawian. Amat Limon tahuk pahatian nang binik , mara am lamak ,mara am bayut mara am surah manugak awan bakakaran., nang ngintok narai nang hakon mamiciki kapala hidin mun minik, mauruti awak hidin mun ringkutan, bisak bamasak gangan sulur kaladik , manyangak mandai awan ba ulah wadik, nang katuju bujur intang rakungan hidin. surahan kada suah bahangkoi, kada suah basasarik , parak ma lima puluh tahun hidin bamantokan kadaksuah tapulatik, nantok nang maulah hidin tasayangi bujur awan binik hidin.

“Ooo ayahmuk balie akan diakuk papuluran parut keleparann”jar Diang Atak ka nang lakik, imbah sumbahayang Isyak pabilak babuat baumbayan ka hotel intang makah nantok. “hemm”jar nang lakik, babulik handak manukar papuluran nang kawa dihantos.

“Kam rial”jar Amat Limon ka Arab nan bajujuwalan. “ARBA rial Syikh”jar Arab nantok pulang. Ammat Limon bapikir‘usali fardal isyaki ARBAA rakatin, nanik ampat rial nek, mun handak manawar taluk magrib,usali fardal magribi SALASA rakatin “SALASA rial Haj”jar Amat Limun. “Nam Syikh Nam” jar Arab tok. Bah! ungh awan arai bujur Ammat Limon bisak basurah Arab ‘mun umaikam umpat hintadik arai kunanguh hidin, ma niring akuk basurah Arab’ tapikir Amat Limon kaya nantok. “Kam rial haj” jar Ammat Limon ka nang bajujualan sabalah kadai hintadik, awan hidin manunjuk ka limping arab nang ganal nantok “SALASA rial Syikh”jar arab nantok. ‘nah! hikamai taluk rial juak, kadak magan mun kadak ditawarik nanik’tapikir hidin kayak daintok.
‘Usali fardal subuhi “RAKAATAINI rial”jar Ammat Limon. “MasyakAllah” jar arab nantok awan bauling-uling kapalak. ‘bah hei, supannyak akuk’i mun umaikam umpat hintadik napak basupanan bujur akukneh’ jar Ammat Limon intang hatik.

Mun ka Makkah basurah jangan rambusah, matak maniring hatik jangan manguyak mun ta rasanik muntung jangan lantih, mun sumbahayang hatik jangan pirut mun takantut baasak ba air’i pulang…….he.he.he…..
UmaYani/UY
UmaYani/UY
Brigedier Jeneral
Brigedier Jeneral

Posts : 3505
Points : 3508
Join date : 22/05/2009
Location : Meru, Klang

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by hasbima@abe Wed Nov 11, 2009 12:39 pm

umai alih ramik pang kisah ka makah nia..mana si Pali Batong...wagas hajakah hidin..UY mun taparaong awan hidin ako bakirim salam ( assalamualaikum wb ) umai tarasa haus pulang..bamandak hulu mancari banyuk hagan mambasahi butuh rakunggan....
hasbima@abe
hasbima@abe
Leftenen Jeneral
Leftenen Jeneral

Posts : 15609
Points : 15721
Join date : 13/06/2009
Age : 62
Location : tamaloh

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by *ROSMAH* Thu Nov 12, 2009 8:35 am

Manyambung carita pangantin hanyar..

Habar nya pangantin nang lalaki kada tapi pintar jar, nikah gin tuhuk ba liuran tok kadhi ma nikahakan kada jua ruhui! ba paluh li'iran hudah pangantin, jar orang di nginumi, parian nya kaluko rakungan karing kah? imbah nginum kada jua lantas manyambut akad tok kadhi nginto! hingga nya ta sanggak-sanggak.. Kada mandayik ah di culasi orang! kaluko di bawah tangga andaki orang katak di bawah tempurung jar! pa' kada hingkat nikah!! nang nyata nya pangantin lalaki tutih kada tapi pintar, kadada orang nang dangki nya, kada marga katak di bawah tangga atau ada nang ba lipat hujung baju supaya pangantin lalaki bungkam!!!!
Maka ari parak tangahari hudah, jadi ada orang kampung nang mambari'ik usul manyuruhakan pangantin tutih di mandi'ik pulang, jadi pambawaan subalah pangantin lalaki mandi'ik ai pangantin tadi. Imbah mandi hanyar lantas manyambut akad nikah tok kadhi jar..

Bila malam di dalam kalambu.. Ranai haja pangantin lalaki! kada wanik ba burinik, kawin gin nang tuhak nya nang ma atur! jadi kada ba pinanduan sa balum nikah, apa lagi handak ba cinta-cintaan kayak orang wayahni.. Nang nyata nya sa balum nih kada suah sa kalambu awan bibini! asa galudupan jantung, asa ba paluh dingin, tuhuk mangicingakan mata kada jua mau ta guring, handak ba pandir kada ta kaluar suara, apalagi handak manjapai-japai..

Pangantin nang bibinian nya ta tuhak, lagi ta pintar jua dari nang laki, inya kada bungas ya'am! jadiam kadada siapa nang ba para', kawin awan laki tutih gin ada ta rait kulaan banarai, amun kada sako jadi anak dara tuhak pang..
Nang bini ta pikir jua, amun nang laki kada ma mulai, inya pang nang kana ma mulai ba dahulu..
Jadi nang bini ba piragahai sakit parut handak ba hirak, inta ginik'ik laki tulak ka jamban di higa rumah.. Ikutai laki tutih siyau-siyau awan lampu suar mahadangi di luar jamban. Bila ba buat di dalam kalambu, u'uringis nang bini ma micik ka parut jar! jadi ba takunai nang laki " Napaan! paguni haja kah sakit parut?"
Ujar nang bini " Paguni haja sakit nih! ca'am ambilakan minyak kapak di intang atas lamari tu bawa ka sia"..
Nang laki asa maras jua malihat, ba dadadas ma ambilakan minyak kapak ma unjuk anu nang bini!
Ujar nang bini " cuba'am di urutakan, kaluko'ai mau ampih amun laki ma urutakan"..
Jadi nang laki tuangai minyak kapak ka tangan, bilang asa mangitir2 jar handak ma andak tangan ka parut nang bini! maras punya pasal paksai ma urutakan..
"Ampih lah hudah?" jar nang laki manakuni nang bini!
"Balum lagi, cuba ka bawah saikit ma urut tuh" ujar nang bini..
Nang laki ma urut ta ka bawah saikit, " intang sinikah?" ujar nang laki ma urut ka bawah pada pusat!
" Kada! ka bawah lagi" jar nang bini..
Nang laki ma nandar'ai tangan ka bawah saikit hampai ka tundun, " sini kah?" ujar nang laki..
" Kada jua! ka bawah lagi" jar nang bini..
Nang laki kada tapi pintar tutih manyurungai tangan makin ka bawah, asa ma ligap jar hati! napang ta japai nang ba rambut he.. KISAH-KISAH BANJAR - Page 2 Icon_redface KISAH-KISAH BANJAR - Page 2 Icon_lol

Jadiam!! hinggan sini haja ba carita, bisak-bisak lah mamikirakan napa nang ta jadi imbah tu he.. KISAH-KISAH BANJAR - Page 2 Affraid
*ROSMAH*
*ROSMAH*
Mejar Jeneral
Mejar Jeneral

Posts : 6093
Points : 6137
Join date : 29/05/2009
Age : 67

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by suroi Thu Nov 12, 2009 2:07 pm

Lu fikir la sendiri, ujar nabil !!

suroi
Lans Koperal
Lans Koperal

Posts : 180
Points : 181
Join date : 28/09/2009

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by hasbima@abe Thu Nov 12, 2009 3:26 pm

minta izin manyambong kisah Kak Ros...

Ni..napa nang kaya sarang karuang niyak...ujar si laki bongol tutih
ditambahinya minyak kapak...napang mangalaupur nang bini kahangatan
intang situk di andaki minyak....umai sarik banar nang bini
kada faham-faham.

Kada boleh jadik ni..mun ka ini dalam hati nang bini...kayapa handak ma-ajari si nang laki ..kaya pa akalan. Mun guring pakai guring pang hampai pagi. Asa ngaleh handak tulak ka jamban di tatangah malam nang bini menyuruh nang ayah maulah jamban duduk didalam bilik cagar sanang mun sakit parot di tanggah malam.

Asa kada tahan awan parangai nang laki...si bini bapadah ka mantuha laki...minta salasikan masalah tutih. Maka nang ayah gin maajari ka nang anak..anu nakai ayah handak malajari...bila guring malam..dimasukkan kapala ikam kadalam lubang kamih bini ikam tutih, hanyar rasuk. si laki nang babongolan tuh,,,kada sabar mahadange malam...maintai dimana nang bini bakamih handak mancari lubungnya.
Hudah tangah malam nang bini gin bakamih di jaban hanyar..jamban duduk. nang laki maindap di luar. Bila nang bini imbah haja bakamih..kaluar handak manyambung guring..si nang laki badadas masuk kajamban...kada lawas tadangar...mahalulung...bakuciak...
imbaham tumbar sakampungan..napang kapala taparusuk dalam lubang jamban..kada kawa dicabut-cabut. Tuhuk mamanggil bomba hagan mamacahkan mangkok jamban duduk tutih. Dt kanui urang napa ikam babuat kapala kadalam lubang jamban tutih. Ayah manyuruh jar mamasukkan kapala kadalam lubung kamih bini hanyar sampurna parkahwinan....Bah bilang garigitan banar...sarik gin ada mambari tatawa gin ada...nang ayah giling kapala....ni kes bukan salah ibu batianan.

barilaan Kak Ros lah....manyambungi kisah andika
hasbima@abe
hasbima@abe
Leftenen Jeneral
Leftenen Jeneral

Posts : 15609
Points : 15721
Join date : 13/06/2009
Age : 62
Location : tamaloh

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by Atong Thu Nov 12, 2009 6:28 pm

ngaleh dapat lakik angkal leiiii
Atong
Atong
Mejar Jeneral
Mejar Jeneral

Posts : 8268
Points : 8310
Join date : 22/05/2009
Location : Alam Maya (Kuala Lumpur)

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by Amat Abon Thu Nov 12, 2009 11:05 pm

napa, lalaki banjar bayutan kah
Amat Abon
Amat Abon
Leftenan Kolonel
Leftenan Kolonel

Posts : 1608
Points : 1635
Join date : 22/05/2009
Location : Bandar Bukit Mahkota

http://www.palmoilnursery.com

Back to top Go down

KISAH-KISAH BANJAR - Page 2 Empty asal balaki

Post by hasbima@abe Sat Nov 14, 2009 12:18 am

Atong wrote:ngaleh dapat lakik angkal leiiii

saja banaran ngaleh mun dapat laki aangkalan
taga mun dapat bini aangkalan gin ngalehai jua
taga mun talajak pintar gin ngaleh jua
aur dipintarinya pang
saraba kada kana
hasbima@abe
hasbima@abe
Leftenen Jeneral
Leftenen Jeneral

Posts : 15609
Points : 15721
Join date : 13/06/2009
Age : 62
Location : tamaloh

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by albanjary Sat Nov 14, 2009 8:31 pm

yang sedang2 saJA SANANG
albanjary
albanjary
Koperal
Koperal

Posts : 205
Points : 207
Join date : 01/11/2009

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by hasbima@abe Sat Nov 14, 2009 11:33 pm

albanjary wrote:yang sedang2 saJA SANANG

basasadang haja jar banjar
nang sampurna mental dan fizikal
bukan nang sarba sampurna = itu hanya hak Allah swt
macamana handak dapat nang samporna
mula-mula isap rokok Sampeorna A ( jangan ikut nia..saja bahahulut haja )


Last edited by hasbima@hassanmarshad@abe on Sat Nov 14, 2009 11:33 pm; edited 1 time in total (Reason for editing : 1)
hasbima@abe
hasbima@abe
Leftenen Jeneral
Leftenen Jeneral

Posts : 15609
Points : 15721
Join date : 13/06/2009
Age : 62
Location : tamaloh

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by didin Sun Nov 15, 2009 7:42 am

jar urang arab "khairul umuuri ausatuha "
sabaik-baik parkara ialah nang panangahannya
jadi nang sasadangnya haja , tutih nang dimaksud Hasbima sako

didin
Brigedier Jeneral
Brigedier Jeneral

Posts : 3388
Points : 3399
Join date : 21/10/2009
Age : 56
Location : Banjarmasin-Palangka Raya

Back to top Go down

KISAH-KISAH BANJAR - Page 2 Empty Re: KISAH-KISAH BANJAR

Post by Sponsored content


Sponsored content


Back to top Go down

Page 1 of 5 1, 2, 3, 4, 5  Next

Back to top

- Similar topics

 
Permissions in this forum:
You cannot reply to topics in this forum