KISAH-KISAH BANJAR

KISAH LEBAI YANG CAKAH


Kainik kisahnya, ada serongan lebai yg sarbannya ganal,kada suah pacul di kapala. 1 hari lebai ni tahaga sorang lelaki kekeruyuk,betakun lebai ni pd lalaki tu." Ikam handak ka mana,kekeruyuk kada karuan?Ujar lalaki tu: "Aku handak mencari tuhan". Lebai tu tatawa sampai tesambur liur mandangar jawapan lalaki tu. Ujar lebai yg cakah pd lalaki tu:" Ikam handak mancari tuhan, aku yg samayang sampai lakok batu basujud gin kada suah tahaga tuhan,amun ikam tahaga tuhan,takunkan tuhan, aku ni masuk syurga yg mana?". Lalaki yg wawangalan gin tarus kekeruyuk mencari tuhan. Akhirnya, tahaga lalaki tadi ustaz,memandirlah lalaki tu dangan ustaz. Dipadahi ustaz tu mcm2.Lalaki batakun pulang pd ustaz pasal lebai yg samayang sampai lakok batu sujud, masuk syurga mana?. Ujar ustaz: "lebai tu masuk neraka, pasal samayangnya kada ikhlas, katuju diitihi urang."

*moral..jangan taksub sangat, kena ikhlas sepenuh hati.

umpat mambaca haja ...

banaran ujar UY..amal kana ikhlas
Ikhlas ni ibu sagala amalan

Satu hari Rasullulah SAW di datangi oleh se orang lelaki anum...bapakaian putih bersi..lagi arum. Duduk batamu lintuhut Rasullulah. Ya..rasullulah...aku handak batakun napa itu Ihsan...napa itu Ikhlas napa itu Islam.
ujar Nabi Saw... islam tu 6 rukunnya
ihsan dan ikhlas..urusan Allah SWT...hanya sanya Ia nang mangatahu-i.
Imbah urang tu balalu...ujar Nabi saw..tulah malaikat Jibril...ma ajari ka samuan para sahabat....

( Ka itupang ringkasan haja ni...... jadi ikhlas.....hah dalam satip amal dan perbuatan )

KISAH PAGAT TALI SALAWAR

Pambakal Anjam mangiyau bubuhan pamudanya nang salawas ini umpat aktip baulahraga. Rupanya handak diadakan partandingan main bal antara kampung Palui wan bubuhan kampung subarang.

“Ikam Rang ai karna awak ikam tatinggi, ikam kuandak manjadi kipar,” ujar pambakal Anjam mamanderi Tuhirang. “Garbus karna lincah maka aku jadiakan panyarang baduet wan si Surawin. Kalu Tulamak aku jadiakan bek di balakang,” ujar Pambakal Anjam pulang.

“Kalu ulun pang Pambakal pian andak di posisi mana?” ujar Palui karna marasa baluman disambat.

“Nah.. sasuai wan gawian ikam nang tukang urut, maka ikam kabagian maurusi medis atawa kasihatannya Lui ai,” ujar pambakal.

Wayah harinya rami takumpul bubuhan warga kampung handak manonton partandingan, masing-masingnya manjagauakan kampungnya. Kampung Palui wan kampung subarang bagagantian manyarang, pukuknya seru banar.

Saparu main kampung Palui badahulu mamimpin, tapi kada lawas dibalas pulang ulih kampung subarang. Tapi imbah istirahat kampung Palui mamimpin pulang. Waktu itu si Garbus nang mancitaknya. Padahal kalu diitihi bujur-bujur tendangan si Garbus itu kada gancang banar jua, tapi karna wayah manandang, sabalum kipar musuh kawa manangkap bola, dahinya bincul badahulu takana sapatu garbus nang umpat jua tarabang.

Tapi wayah partandingan parak habis, gara-gara Utuh Ganal si kapten kasabalasan main sambil mangunyah bombon karet. Nangkaya apakah mulanya, tahu-tahu inya tataguk bombon karet nang tasangkang di rakungannya. Langsung aja inya kada kawa banapas, habis itu dibawa ka puskesmas. Nang jadi masalah adalah siapa nang menggantikan si Tuganal.

Pambakal Anjam sebagai palatih bingung. Padahal sidin baisi pemain jumlahnya pas-pasan banar.

“Siapalah nang menggantikan si Tuganal?” ujar pambakal sambil mangurek talinga.

Kada lawas sidin malihat awan si Palui, si tukang urut kasilahu.

“Uuuiii…Lui, handaklah ikam manggantikan si Tuganal?” ujar pambakal.

Mandangar parmintaan pambakal, Palui mamisiti ikatan salawarnya.

“Kalo jadi bek ulun hakun ai, amun jadi penyerang ulun kada kawa bukah laju pambakal ai,” ujar palui masuk ka tangah lapangan.

Sudah sapuluh manit Palui main, rupanya banyak pergerakan tanpa bola alias bubuhan kakawalannya kadada nang mau meoperinya bola. Kamana bola bukah, kesitu Palui maumpati. Kada lawas Palui kauyuhan saurang lalu baparak lawan kipar.

“Ayo maju Lui, ba apa ikam baparak lawan aku,” ujar Tuhirang. Kabujuran ada serangan matan bubuhan kampung subarang.

“Hadang, Lui…..hadang…..jangan mau kalah!” ujar pambakal bakuciak.

Tapi Palui kada handak bagarak jua. Sekali tendang bola masuk ka gawang tuhirang, persis lawan bunyi paluit wasit. Kadudukan akhir imbang 2 – 2, kampung Palui kada jadi manang.

“Nangkaya apa ikam ini Lui, ada musuh kada ikam hadang!?” pambakal bamamai wan Palui.

“Kadanya nangkaya itu pang pambakal ai, tadi itu tali salawar ulun pagat. Mun ulun manyasahinya, tabalului selawar ulun, maka ulun kada basalawar dalam,” ujar Palui sambil maingkuti selawarnya.

(TUMATAN BANJARMANIS BUNGAS.COM)

ooo tumatan banjarmanis

patut bahasanya ingoh indonesia!!!!


~Atong~manis ada lawa ada ngeh ngeh ngeh

Utoh Hirang = Tuhirang
Utoh Kacil = Tukacil
Utoh Ganal = Tuganal
Utoh Kuwait = Tukuwait = Tu-Q8

he he he nah handak bahurup ngaran pulang aku ni

SUINGGGG!!!!!SUINGGGG!!!!!SUINGGGG!!!!

salam....umpat maandak kisah jua....

kisah ni di caritakan uleh paksuku,halam kira2 40 tahun hulu si utoh ni sampailah masanya mancari juduh...ba padah ka kawitannya...
uma...carikanlah ako juduh maram hak bibinian di kg neh yg anom2,supan taga bisaan bamasak....ako neh katuju makan mak ii...

abahmo...ayuhak kita carikan bini hagan utoh neh....ako ni ada dipadahkan urang ank si limah tapai tu parunah jah...anom bisaan bamasak,saing banar,lantihan gawian....takoni hak kawitannya bahmo ii....

salang sabulan...baarohanlah si utoh wan si diang ank limah tapai toh...utoh basukur nar karna juduh carian kawitannya toh manapati saliranya...paruna,anom,supan...hehehe maklomlah pangantin hanyar jar...kaisokan arinya...malo2 si diang neh...susubuhan dah bangun....bakuboi bakuciakan wan utoh..bah arainya pang pangantin...imbah tu si diang pon mamulakan tugasnya malakat api,manjarang banyu,maulah makanan hagan laki dan kaluarga mintuha..
arailah kawitan utoh manireng saingnya mananto hanyar neh...papagian dimasaki limpeng nior,diulahakan ayer kupih,...arom kupih sampai ka amben...

sampai tangahari..si ayah neh batakon ka diang...
ooo yang...abah handak tulak ka pakan neh....napa lauk hagan masak tangahari...si diang ni rupanya ada kapinginannya taga handak palihara supan tuh jadi di diamkan hajak...padah inya ka mintuha tu...kada apalah ayahai...barang haja lauk napa pon kina kumasaki lah...

parak jam 12,buliklah si ayah neh...si diang pon mahungkar kampil tukaran ayahnya tuh...hann napa..!!!!...talihatlah si diang barang kapinginanya tuh...macam taho2 ja mintuhanya tuh...arai banar si diang mahungkar kampil baiisi siput sadut...baangan2 inyak mmm nyamannya ulah sasangan kambuh kaladi...ditirengnya kaladi mintuhanya ganal2 kaya batisnya...manciur ilat si diang...sambil manyiang siput sadut tuh,si diang baasa supan pulang kiapa kina mun inya manyadut siput tuh....tanto kina disambati kalurga mintuhanya buruk nar kalako manantonya...si diang ni mon manyadut siput tuh kada maho bahimat2 ilonnya adusss...minik kapala si diang mamikrkan kiapa inya handak manghantos siput tuh tanpa ditireng kaluarga mintuhanya....

sampai waktu makan,si diang ni bahidang la...ancapnya si ayah,uma wan lakinya ni manghantos siput sadut tuh..sidiang kirip2 mata manireng manahan nafsunya..basurah si ayah.."napa diang balauk wadik haja...kada digatuk sasangan siput neh...''...sidiang dgn pantas pon menjawap...kada katuju yah hai siput tuh..tuhuk nak manyadut..si ayah ni pon taros mahantos wan laki sidiang sampai talah sapinggan bujungan siput tuh...

tiba waktu malam...si diang kada hingkat guring...sumat baalih ka kiwa..sumat baalih kakiri...dlm kapalanya kaganangan lauk siput tadi yg dipatak nya samangkok di dalam guri ganal pinjung dapuran.....kada hingkat ditahan nafsunya...si diang bangun manuju kadapur...juuk2 inya bakakat takotan didangari lakinya wan mituhanya...sampai di higa guri diang pon baakal masuk bahinip kadalam guri tuh lalo inya manyadut siput tadi dgn lahapnya...sakali manyadut...SUINGGGG!!!!!bagamat ilonnya sarumahanan kada hingkat guring...SUINGGGG!!! SUINGGGGG!!!! nyaring banar ilon madaik pang dalam guri...bangunan mintuhanya mancari manakah datang ilon SUINGGG!!!! tu tadih...si diang neh dah ralit banar sampai kada kadangaran urg rumahnya gamat mancarinya...bila tapasang lampu...si diang pon takirip2 matanya sambil takuriheng mamagang mangkuk baiisi siput sadut yg dah talah di hiutnya... ...


kasimpulannya :...jadilah diri sendiri,janganlah hipokrit

bravoooo kakchik mischa

boleh babuat dalam raja lawak la citer ni.



~~~ makaseyyyyy!!!!!!!!

Kak ros gin suah mandangar carita ni dari mamarina, memang bujur2 ta jadi di kampung kami tapi si diang nih ma hiyut siput tutih ba huyung dalam gumbang puang! jadi bunyi nya pada "cooonnggg" ha' sing hangkuiyan..

cerita apa yg handak di ceritakan kaka ros..

Kak Ros tu merespon kisah yang dihantar Misha tu...andika Kawo ai..

jarnya marinaannya bakisah kaito jua...taga versi lain sikit...

*ROSMAH* wrote:Kak ros gin suah mandangar carita ni dari mamarina, memang bujur2 ta jadi di kampung kami tapi si diang nih ma hiyut siput tutih ba huyung dalam gumbang puang! jadi bunyi nya pada "cooonnggg" ha' sing hangkuiyan..

naran kak long...guri tu gin puang...awaq si diang ni haloi jag tu yg hingkat bahinip dlm guri...mon awaq ko.... heheheh....inya mimang kisah banar2 tarjadi...

UmaYani/UY wrote:Kak Ros tu merespon kisah yang dihantar Misha tu...andika Kawo ai..

jarnya marinaannya bakisah kaito jua...taga versi lain sikit...

Bujur ujar UY tu KAWO'ai..
Mamarina kak ros gin suah ba carita macam Misha carita'akan tutih tapi lain nya cuma ma hiut siput sedut tu di gumbang ganal puang jadi bunyi nya lagi gancang ba a'wuw (bergema)..

maey kambu wrote: bravoooo kakchik mischa

boleh babuat dalam raja lawak la citer ni.



~~~ makaseyyyyy!!!!!!!!

ankkamanakan ko suah hai maiisi borang raja lawak tu ngaran ko...sib baik
kada tapilih heheheh....hingkat ii balawak....

maeyy...napa jarang2 cangol di siak...awor ka

BARARAMPAAN
(Nukilan NilaSakunta/NS)



“Napa am pikiran andika dangsanak nya?” Ujar Pakacil Sahran manakuni kanu si Pakacil Asmuni kawan rakat hidin tumatan lagi halui nang kada lawas lagi cagar sasamaan tulakan balayar ka Makah laki binian.

“Ayuh ha diako mangiring mana nang baik di pakiraan diikam pang dangsanakai” sahut Pakacil Asmuni tanda batarukuian bacara sama haja pang pada magun baisian saikung saurang anak pahaluiannya cagar ditinggalakan balayar kayina.

Udin anak bungsu lalaki Pakacil Sahran hanyaram 17 tahun, rajinan urangnya, amun bagawian babandang matan kawa banar hudah di harap cagar nahap pang kikiwangan. Sapiah dara sunti 13 tahun anak halui Pakacil Asmuni, bungas jua malaran tagal unggahnya makalahanam.

Janji hudah dibuhul kada napa apa pasihulnya, laluan di salajurakan ai. Udin wan Sapiah salamat dikawinanakan. Badua pawarangan Pakacil Sahran, Asmuni lapang hudah kiraan, tinggal mahadangi kutika cagar balayaran ka Makah jua am lagi.

Kapal ganal Bunga Raya bamula bakunyung sarat awan jemaah bakal haji maninggalakan Palabuhan Klang, kula, warga, dangsanak papasingnya kancawain tanda manguya akan salamat jalan. Udin pina habang bigi mata asa rawan malapasakan kawitan, mintuha palian. Sapiah magun ham gagaliwalak karamian matangan kawa balalah jauh gilir nih napa. Cakada tahu bilang malima bulan dudi hanyar badapatan lawan kawitan pulang……..inggih, amun landang umur?

Walau hudah balaki lamun parangai si Sapiah mangun ham manganganak, Udin manyubuh hudah am bingkas tumatan di panyaungan, mancurung api dapur baharaguan hagan pupuluran pagi awan sangu cagar dibawa ka bandang. Sapiah maka am sasain pisit bungkunan kanyaman guring, salagi kada mancirat matahari cakada awahan bangun, malandau tantan. Rumah hambur tauran, paguringan kada maangkah manyimpunakan, batatapas maginnya ai. Ayuha napa tuh ai Din ai……….Basasabarai pahadangan!

Udin nang hanyar haja bulik tumatan di bandang tangahari tutih kababang pabila Sapiah bini sidin kadada di rumah.

“Piah oooh Piah, di mana garang diikam!!” Hangkui siwara Udin bakiyauan.

“Ada ai…….ako di sia nih.” Sahut si Sapiah nang rahatan baulit sapakawanan di bawah rapun hampalam di higa bantangan. Babaya diparaki leh si Udin……….

“Piah….hudah jua ah bamasak diikam tih?” Ujar si Udin manakuni nang bini.

“Bamasak?.............rahatan am nih….hadangi satumat lah.” sahut si Sapiah sambil manunduk babuat ka rarampaan batang hubi bahatap kalaras pisang. Pina kulisitan, sambil lihum bapair papasingnya kakanakan bibinian maanam ikung sapakawanan bini Udin di situ tih.

Astagafirullah al ajim…………………Tadikir satumat si Udin pabila tajanaki bini saurang magun haja lagi kada tuhuk manganganak, bamainan rarampaan (main pundok-pundok ujah Malayunya) barandak ai, tampurung diulah ilah lasung batu, piring sing lawas, kuantan buntus, taruk hubi, daun salaput diracak sayur wan gangannya napa. Handak dimamaie kaluko supanan mun katahuan urang. Imbah dihija akan ranai!

Badadas Udin mangayuh biskar buruk nang kawitan baampah ka kadai. Ari hudah tangahari maning cakada bajualan iwak lagi,nasib ada batinggalan ampat ikung iwak kambung rabus, kacang panjang sakacakan, cabai habang ganal lima bigi habis ai di tukari sidin.Imbah maandak ka tutukaran tutih……….

“Bulikan ha dahulu ading-ading barataan ai, kayina patang baasa pulang, ari parak luhur hudah nih, ayo Piah lakasi bulik” Ujar si Udin manguloki kakanakan ninto tih. Baik jua si Sapiah tutih pina pamaasian haja, tida mau sako diinjingnya talinga leh Udin. Kaya kawitan mangusari anak ha lah hai!

“Dibarasihi batis, tangan tuh dahulu Piah ai,imbahnya hanyar baparak ka sia nih” hingkau Udin kanu nang bini. Pintar haja tukohnya si Sapiah hakun manurut parintah laluan basila mahadapi Udin.

“Bisa ai kalo malalap kacang lah, nyaman haja damia nah.” Ujar si Udin sambil maarai akan kanu nang bini.

“Nah ayuha salajurakan” hingkau Udin malajari nang bini. Mandingur bau randangan iwak awan tumisan kacang panjang, dua laki bini rahat auran baharaguan di sarambi mintuha si Udin.

“Kayina amun ada talihat Cina bamotor nang bajualan ikan tuh tukar lah, nah duit” ujar si Udin mamadahi nang bini wayah handak turun bagawi ka bandang pagi nia tih.

“Ayuha” handap sahutan si Sapiah nang magun balingkar di paguringan. Alhamdulillah, wayah ditinggalakan bagawi leh Udin bamula bisa hudah si Sapiah basasapu ratik, basisimpun, dadaian dinto mahibak tatapasan, marga dipadahi bahimat leh nang laki patang samalam napa, ampih kaganangan rarampaan.

“Ai napa garang kadada ah ikan lain nang dijual leh Cina ninto tih Piah.” Takun si Udin kanu nang bini wayah handak bamakan tangahari nya tutih.

“Banyak ai, aku kada tahu bacara dika malajari diako mamasaki ikan wan lalapan nang nia haja pang” sahut si Sapiah nahap. Labaram Din ai!!

Ayungannya baduhara am si Udin malajari sarabanya kanu nang bini, takajut umaknya si Sapiah pabila bulik tumatan di Makah malihat kalakuan anak rajinan, jua hudah bisa sahadanya.

Tahuam ………wayah nang di dalam kalambu ninto…….di mapa kah sako si Udin malajari nang bini, napang bilang maampat tahun kawin hanyar bapakulih saikung anak!


Damini manjarau hudah cucu. Kisah kawan ku saurang kada kana mangana wan urang lain.

Rame' mambaca kisah orang..
Kak ros hudah kada kaubaran handak ba carita lagi..
Ma isi'ik foram gin di sawatakan narai..

mishaannur wrote:

maey kambu wrote: bravoooo kakchik mischa

boleh babuat dalam raja lawak la citer ni.



~~~ makaseyyyyy!!!!!!!!

ankkamanakan ko suah hai maiisi borang raja lawak tu ngaran ko...sib baik
kada tapilih heheheh....hingkat ii balawak....

maeyy...napa jarang2 cangol di siak...awor ka

kada awor aku kada mancungol
amun awor hanyar maka mancungol

~

TADALAK

Ulahan: Nilasakunta




Hanyaram dua malam arwah Hjh Marsitah bulik ka rahmatullah tagal bilang gigir hudah sakampongan mamadahakan hidin mati jadi hantu jar.Pabila bamula sanja haja sintup pang barataan kada nang wani nya turun pada rumah katakutanan napa.Pada Mawi saikung jua nang kada pacaya kisah-kisah urang tutih.Asa mambadae jua sapang garang si Mawi nito, sakampungan urang pinandu, Mawi si jagoan Kuntau Banjar kada saikung badua China kominis nang di sumbalih hidin wayah paparangan Sg.manik manantang bintang tiga bahari bakas murid Patuan Guru Hj.Bakri kalo tuh....he,he!

"Ai Mawi cagar kamana garang basasanjaan nia.....?" tagur pakcil Emoh pabila talihat kalibat si Mawi lalu di halaman hidin. " Kamanang lagi mun kada gasan mamalami rumah pusaka
lawas tuh kakaknya ai.....bacara umanat ya am, di napa tuh ai" jar Mawi tih pulang. " umai wani haja lah pina manyaurangan kadamia......kaluko ah" pakacil Emoh. " Cah napa pang kak ai ......maniga puloh ikung kominis lagin ku sumbalih nia pulang am baya hantu tutih ha.....Ayuha amon bujur dika mak aji Masitah ai mati jadi hantu datangi ako malam nih kayina taho tuh langit randah kada nya!!" hangkui suara Mawi sambil manapuk dada tanda wani napa.... Tuhuk jua pakacil emoh mamujuk,manangati cakada nya mahirani...ai urang harat kalo!

Mangunyur jalan si mawi maninggalakan halaman rumah pakacil emoh ari tih sasain sanja sapamadaran nasi hampai ka rumah ganal pusaka tutih, jauh pada urang di panangahan kabun gatah andaknya.Lampu minyak gas di likiti ,kalambu hudah di gantung, uho...uho bunyi batuk Mawi pahadangan mata mariot.
Rahat bamula hayal handak barabah kanapa pulang parut si Mawi asa mangalagusak talalo kabanyakan mamakan gangan pisang mangala siang tih kalo malam labaram.... ah kada jadi nih .....maka pambahirahan tajauh jua saikit pada sarambi, tuh intang parit di pulaui rapun bamban tagal hakun kada hakun bacara pambawaan parut saurang jua napa tu
ai.Kacamplongan am gugur ka banyu parit angkara hajanan si mawi bapala banar!

"Oooo Mawi ikam tih kapingin badapatan lawan ako kalo tih" sabigi suara Hjh Marsitah wayah hidup. sakali di itihi leh Mawi putih batalakong pina kakancawai manatar mamaraki inya. " Nah amon dayinto banaran jau tuh dika nia mati jadi hantu......malalain haja ilmu nangapa kuang nang dika pakai kajadian kadamia?" jar Mawi bawani tagal bulu awak bamula mamburinjing. " umai lah Mawi kapupurunan ikam lawan diako......ayu kasini nah......he,he,,heee" sittt....Mawi mancabut ka parang bungkol nang bangaran kajang rungkup.....rawis kahadap,kakiwa,kanan kada mambari bakas...... " hudah ha Mawi ai napang bapanapanat.....caka kita bagayaan ....matan rami....he,hee,heee" .

Tumbar hudah paloh saawakan .......bunyi tatawa hantu Marsitah maulah Mawi kada katahanan.... bumi di jajak asa ba ambul.....napa lagiam.... bis...Mawi bukah naik ka atas rumah tarus babuat kadalam kalambu bakalumbun di tilam buruk samalaman tantan kada taguring.....kada apa jua ....burit nang kada babasuh nito pulang di mapa am?

Esuk manyubuh hudah hampai si Mawi karumah pakacil Emoh.........Gilir nih tadalak am ako kak ai....dasar banaran ujar dika.....hantu kada kawa di timpatimpas....umai mawi burit tutih di basuh jua ah hudah......ha,ha,ha ganak tatawa pakacil Emoh manambahi barau di hati Mawi......Hapos muha!

Mimpi Si Palui.

Sumalam Palui bamimpi saikung singa mangapong hidin. Si Palui takutan babanar lalu bukah sadaras-daras nya...tajumpa sapohon kayu nang ganal awan rendang. Lakasi hidin mamanjat sampai ka suting dahan lalu duduk ai badangkak...hidin manireng ka bawah magun ai singa gagaliyur kuliling pohon mahadangi hidin. Lawas jua hidin badangkak di situ, lalu manireng ka higa awak.....han napa tia takajut hidin intang dahan nang di duduki kada jauh di pangkal nya ada 2 ikung tikus ganal nang rahat maigut dahan nang di duduki ngitu....saikung putih saikung hirang. "Umai am satumat lagi gugur aku ni". "singa mahadangi di bawah tu". Surah hidin surangan...dalam hati.... lalu am hidin manireng baasa ka bawah malihati singa... umai am ada pulang saikung ular nang ganal rahat mangulintar di bawah...bujuran bawah hidin...muntung ular tu ganal nya Ya Rabbi..dalam muntung ular nang ganal tu hirang sa hirang nya...amun gugur tarus aku ka muntung nya... Palui makin pucat.... kada karuan...hidin manireng pulang kaatas kepala.... ada suting sarang wanyi (lebah). Madu dari sarang wanyi tu guguran satitis dua.... hidin mahulur ilat cuba marasani madu nang guguran ngintok... uma am nyaman nya madu ni..... kalumpanan hidin awan ular, tikus awan singa...ya am amun di "Seven Heaven" ujar Palui....kalumpanan awan singa, tikus, ular...rahat kanyamanan tu tatiba...kadangaran ilon bini mahiyau..."Abang Palui" ..." lakasi bangunan jam 5 udah satumat lagi subuh" .... han napa tia bamimpi aku rupa nya jar Palui di dalam hati... Palui badadas bangun mandi lalu tulak ka masigit.....sampai di masigit solat sunat lalu subuh di imami Pak Kiyai. Limbah subuh Pak Kiyai bazikir awan batazkirah pulang. Palui gen umpat jua...salawas nya Palui limbah subuh badadas bulik..Pak Kiyai talihat Palui magun ai di masigit manyambat di dalam hati " Pinya pang Palui ni... sarajin badadas haja bulik limbah subuh kada mahadang aku batazkirah".... Limbah haja talah tazkirah badadas Palui mamaraki Pak Kiyai batakun maksud mimpi tadi...Jar Pak Kiyai...Singa dinto kematian kawo....inya senantiasa mangapong kawo...Tikus nang dua tu pulang...hari siang awan malam...putih siang...hirang malam..bakuliling awan kawo..malalaikan awan saraba nya pang...madu wanyi tu pulang nikmat kalazatan duniya ni pang malalaikan..amun talabih marasani nikmat duniya kawo kalumpanan awan mati...ular nang balingkar tu Palui ai kubur kawo tu ah....jadi am Palui ai aku batazkirah lawan kawo....

Kaitu pang kisah mimpi si Palui. Bujur ai lih kalazatan duniawi malalaikan kita awan mati awan kubur. Subhanallah.

banaran Utuh Q8
jar urang tuha-tuha
dunia tu dijinjing
taga Akhirat di kindung


jangan hampai nang dijinjing kalapas
nang di kindung kaciciran

AKIBAT KADA PAASIAN
Ulahan: Ninianom



Pagi tadih masa tulak baumbaian ka sakulah wan Jurinah, Abib, Iros , Paridah wan Intan, dipa nih madahkan ka diyang, jer malam ni ada carita Malayo di TV batajuk "Jalak Lenteng". Biasa lah satiap malam Sabtu ada carita Malayo nang di hadang hadangi urang kampung satiap minggu. Rumah nang paling parak ba TV ialah rumah Wak Sanip, kira urang kayalah di kampung tuh. Rumah nya dari rumah diyang mun bajalan batis kira kira 20 minit, kada la jauh bangat tagal nang kada rame tuh ialah kadap, dah lah daida basuar, jalan nya pulang kanan kiwa tagah. Ada jua jalan nang agak baik saikit, kira jalan ganal laaa...tagal pulang kana manampah jalan kubur, tu nang asa mamburinjing gulu tuh bila maingat ingatakan.

Kaya malam malam Sabtu nang tadahulu, tuhuk la diyang ni marayo ka uma ayah handak tulak manireng carita malayo. Uma ayah diyang ni kada taho lah pesen apa..kuno bangat...jer uma ayah BADUSA babini bajalan tangah malam, tu nang asa marista bangat tuh, padahal kawanan babini diyang nang lain kada suah taliung tulak manireng carita malayo, bukan kawan kawan haja nang tulakan uma ayah dipa gen umpat tulakan, mawa tikar bagulung nang di kapit di katiak hagan dudukan saparanakan kina.

Diyang dah baajam, malam ni diyang musti tulak jua, jer kawanan diyang carita "Jalak Lenteng " ni saja best. Biasa la mulaan nya diyang marayo ka uma ayah handak tulak. Jer diyang " sakaliiiiiiiiii hajaaaa". Napa jawapan uma?? "jen takuni ayahmo". Tulak pulang ka ayah, ayah pulang manjawab "takuni uma mo",...parak saratus kali diyang nakuni uma ayah, jawapn sarupa haja. Diyang dah manangis dah, marista wan kasarekan, napa kawan dah bapuluh kali mangiau diyang , carit adah handak mula. Akhirnya ditinggalakan kawanan diyang, putus lah harapan diyang handak manireng carita "Jalak Lenteng"...manangis la diyang sampai taguringan.

Baisukan harinya kawanan tolong mancaritaakan carita malam tadih, sadih bangat hati diyang kada dapat manireng carita tuh, jer carita nya sadihhh bangat, hiro wan hiroin nya bungas wan langkar jer.

Minggu ni pulang jer carita lakunan P.Ramli, carita "Uma Mintuha ku". Diyang ubah tektik hanyar...hanyar mamukul 5.00 patang, diyang badadas bamasak masakan kasukaan ayah uma, basasadi, sunyaan lauk dah tahidang dibawah tanggui. Malam nih diyang bujur bujur inta balas kasihan uma ayah, tagal macam minggu minggu sabalumnya, jawapan ayah uma sama haja "takuni uma mo..takuni ayahmo...". Bila dah muyak mandangar kawanan mangiau diyang, apalagi malacong la diyang umpat kawanan, bukah mancicit, kada manireng balakang lagi dah..dalam hati takutan jua, mana tau ayah mangapongi diyang kah....mamupuh diyang kah.

Carita gen bamula....hanyar 10 minit carita bamula, cuntang gen kalinting kalinting babungi inta di andaki duit, diyang bapiragah kada mandangar haja..napa sakupang gen kada baduit, umpat kawan kawan haja, duduk gen bakajal di atas tikar bawaan kaluarga kawanan diyang. Bila carita bamula, urang sakuliling gen mula basurah jua...panuh parasaan...mun dalam carita tuh, si mintuha jahat, bah alihai....nang panuntun gen umpat manyariki si palakun tuh, muyak nya ai...mun sadih pulang, ummai panuntun sakuliling bahimat manangis..kira bujur bujur maikuti carita. Diyang ni asa muar bangat manireng kalaku panuntun nih, diyang handak manireng carita dalam pilem, tagal urang nang luar pilem pulang nang bahimat himat baamuk amuk kada tanto pasal.

Kada lawas, carita bamandak stumat, sabab handak manayangakan "Warta Barita". Pahadangan warta barita tuh, urang nang baduit tulak batutukar makanan nang dijual anak anak Wak sanip. kada taho kanapang situsaini tarasa handak bakameh, jadi diyang gen tulak la higa rumah Wak Sanip kadalam parang tagah. Hanayr habis bakameh masa handak mamuruk salawar halui, malqm tuh diyang batapih wan babaju kurung, situsaini tatireng babini tuha batalakong maikup kampil, hanyar bulik dari surau tukuhnya...ummai dalam hati diyang baharungut " saja alim urang tuha naya, urang saparanakan manireng TV, inya surangan tulak ka Masigit atawa ka Surau mambaca kitab wan sumbahayang". Balum gen sawat diyang handak batapih..situsaini diyang manireng urang tuha tuh tarus ha malanggar rumah disubalah rumah Wak Sanip...tarus ha bajalan..tambussss...sampai ka subalah sana rumah, napa lagi takipik diyang..diyang ingkuti haja tapih taros bukah masuk disasala kawanan tadih, manggatar pang kada hingkat baucap lagi. Kada taho lagi napa sambungan carita "Uma Mintuha Ku"....kada hingkat bapikir lagi dah, urang sunyaan kada taho napa nang diyang hadapai tadih, diyang gen kada hingkat duduk lagi, badangkak haja katakutan.

Samingguan diyang gareng, jer uma diyang aur maigau haja, satumat takuriak, stumat manggatar, bilang gigir sakampungan. Uma kada katuju maambili Bumuh hagan maubati diyang,pasalnya uma ayah kada pacaya bumuh lagipun jer ayah uma syirik, Tagal urang kampung bakaras, lalu di ambili bumuh maubati diyang cara kampung.

Bila dah ampih, awak diyang gen talalo lamah, parak 2 minggu diyang kada kasakulah. Di malam nang kadap lagi sunyi diyang tapikir, mungkin napa nnag diyang alami nih, adalah balasan Tuhan atas ulahan diyang ssaurang, KADA PAASIAN WAN KAWITAN

ako managguhi Diyang tu UY masa bahari , masa kakanakan

waw wrote:Kada nya U Y kadak....


nginto kisah bat kakak Diang Malacong

Ada haja alih nang ba ngaran Diang Malacong he..
Ka kalacong haja luko hari-hari..

kalikir wrote:

Nia orangnya
yang bangaran Diang Malacong ( DM ) Kak Ros'ai

Dimana gambar nya? kada hingkat di katik2?